Il-President Ta’ Malta Jappella Biex Irħula Oħra Jagħmlu Bħan-Naxxarin U Fil-Jiem Tal-Festa Jaħsbu Fil-MCCF
Dalgħodu fin-Naxxar l-Eċċellenza Tiegħu il-President ta’ Malta Dott. George Vella u s-Sinjura tiegħu żaru s-sede tas-Soċjetà Mużikali Peace għall-okkażjoni annwali u tradizzjonali fejn l-għaqdiet lokali kollha joffru donazzjoni lill-Malta Community Chest Fund.
Din hija attività li ilha ssir għal numru ta’ snin fin-Naxxar fejn ta’ kull sena, l-attività ssir f’imkejjen differenti fil-lokal u jinġabru fondi b’riżq il-Malta Community Chest Fund.
Din id-darba l-attivita’, li ssir il-Ħadd ta’ qabel il-Festa ta’ Marija Bambina, u din is-sena kien imiss li ssir fis-sede tal-Għaqda Mużikali Marija Bambina, Banda Vittorja, Naxxar iżda peress li l-Banda Peace qed tiċċelebra l-160 sena mit-twaqqif tagħha, intlaħaq ftehim bejn il-kumitati ċentrali taż-żewġ baned u l-attività saret dalgħodu fis-sede tas-Soċjetà Mużikali Peace, Naxxar.
Il-President ta’ Malta l-Eċċellenza Tiegħu George Vella faħħar din l-inizjattiva u fakkar li għalkemm għamel appell biex din tittieħed minn lokalitajiet oħra, jidher li sa issa, baqa; biss in-Naxxar li jagħmel dan l-avveniment importanti u ta’ ġest nobbli.
