Bil-Filmat: Jien L-Artist – Cherylis – Il-Karba T’Artist Professjonali Tidwi Fit-Teatru Manoel
Jien L-Artist kien wieħed mill-ismijiet ta’ kanzunetti semifinalisti fit-tieni edizzjoni ta’ Mużika Mużika – Festival Kanzunetta Maltija. Bi kliem u mużika ta’ Pamela Bezzina, mżejna bil-vuċi tal-kantanta Cherylis, dan it-titlu kellhom konnotazzjonijiet tqal miegħu, mhux għax ma jinftiehemx iżda għax kellu fih tifsira profonda… Il-karba ta’ kull artist professjonali.
Fi kliem l-awtriċi Pamela Bezzina, “is-silta tirrifletti ċar il-ħsibijiet profondi li tesperjenza l-kantanta nnifisha bħala artista – minn meta tibda toħlom li ssir artista professjonali imma ssib min ma jemminx f’dak li tista’ toffri, fejn dak li huwa kollox għaliha jista’ ma jfisser xejn għal ħaddieħor; fejn id-dubji kontinwi fuq dak li ħolqot jagħmluha persuna vulnerabbli bħal kulħadd, anke jekk tidher kunfidenti fuq palk jew waqt l-esibizzjoni tagħha.”
Filwaqt li l-prestazzjoni inkreddibli ta’ Cherylis waqt Mużika Mużika – Festival Kanzunetta Maltija ħa tgħix għal dejjem, ġie maħsub li din il-kanzunetta jkollha viżiv uniku għaliha. Għaldaqstant it-tim ta’ Cherylis ħaseb li jiffilmja vidjo mużikali ġewwa t-Teatru Manoel, ġojjell artistiku Malti fejn l-arti tiġi ħajja.
Tqabbad il-vidjografu Kurt Cauchi, kif ukoll għadd ta’ artisti mix-xena tad-drama, żfin u anke l-kant biex jesponu t-talenti tagħhom, u jiġu apprezzati għalihom, fuq il-palk tat-Teatru Manoel, bir-rikezza tad-dettall warajhom. Fi tmiem l-iffilmjar tal-vidjo Cherylis qalet “ma stajtx nimmaġina xejn aktar għal din il-kanzunetta, u nittama li l-messaġġ tagħha issa jidwi daqsxejn aktar – għaliex l-artist qiegħed hawn jittama li xogħlu jiġii apprezzat – kif fuq kollox jiġu apprezzati xogħolijiet oħra.”
Jien L-Artist ilha disponibbli biex tindaqq jew tinxtara fuq il-pjattaformi ewlenin tal-mużika diġitali fosthom: Spotify, Deezer, Google Play, Amazon and iTunes grazzi għall-kumpanija tad-distribuzzjoni internazzjonali; CAP-Sounds mit-13 ta’ Mejju. Nittamaw li tkomplu ddoqquha.
Għal aktar informazzjoni dwar Cherylis, inħeġġukhom sabiex tagħtu ħarsa lejn il-paġni tagħha fil-medja soċjali: https://www.facebook.com/Cherylis.Official/, https://twitter.com/Cherylis_Music jew https://www.instagram.com/cherylisc/.
