L-ewwel servizz tat-tip tiegħu f’Malta biex priġunieri nisa jiskontaw l-aħħar parti tas-sentenza f’residenza
Il-Ministeru għall-Politika Soċjali u d-Drittijiet tat-Tfal estenda ftehim soċjali illi kellu mal-Fondazzjoni Rise sabiex filwaqt li ikompli jingħata s-servizz lil priġunieri rġiel biex jintegraw lura fil-komunità, issa jibda jingħata servizz ġdid f’residenza li tilqa’ nisa priġunieri li jkunu qegħdin jiskontaw l-aħħar parti tas-sentenza tagħhom. Din se tkun l-ewwel residenza tat-tip tagħha f’pajjiżna, u li se sservi biex dawn in-nisa jintegraw lura fis-soċjetà.
Il-finanzjament għaż-żewg ftehimiet huwa ta’ madwar miljun ewro, fuq medda ta’ tliet snin. Fih se jkun offrut servizz 24 siegħa kuljum, residenzjali u anke day community-based care sabiex jgħinu b’mod fiżiku, spiritwali, soċjo-legali, u minn aspetti psikologiċi lill-priġunieri.
Iċ-Chairperson tar-Rise Charles Mifsud, sostna li dan il-programm huwa offrut lil persuni bil-parole u li jkunu qed isegwu programm residenzjali. Dan billi fl-aħħar xhur tas-sentenza tagħhom, priġunieri li juru bidla pożittiva fl-imġieba tagħhom jingħataw ċ-ċans jintegraw fil-komunità, jaħdmu u ma’ jkunux ta’ piż fuq is-soċjetà iżda jikkontribwixxu wkoll.
