Taf kif tnaddaf l-iscreen tal-laptop mingħajr ma tagħmel ħsara?
Għal ħafna, il-laptop huwa għodda indispensabbli li jużaw ta’ kuljum – kemm għall-skopijiet ta’ xogħol u anke għall-skopijiet personali. Huwa fatt, li meta l-laptop jintuża ta’ spiss, l-iktar parti li tiħammeġ malajr u faċilment hija l-iscreen. Għaldaqstant, tajjeb li l-iscreen jitnaddaf spiss hekk kif narawh li jibda jitħammeġ. Madanakollu, dan irid isir b’attenzjoni sabiex nagħmlu ħsara mill-inqas. Qabel xejn, aqra l-manwal tal-laptop tiegħek għax kull oġġett huwa uniku. Mill-bqija, tista’ ssegwi dawn il-passi…
- Ara li l-laptop jkun mitfi u li ma jkollu l-ebda wires jew oġġetti oħra mqabbdin miegħu.
- Uża ċarruta xotta tal-microfibre biex tfarfar l-iscreen.
- Ara x’tip ta’ screen għandek quddiemek qabel ma tuża xi prodotti tat-tindif speċifiċi. Jekk jiġik id-dubju, l-ilma bil-ħall dejjem huwa aktar sigur.
- Jekk ser tuża xi spray, qatt tisprejja direttament fuq l-iscreen, imma fuq iċ-ċarruta.
- Xarrab b’ilma ddistillat il-ġenb taċ-ċarruta u imsaħ l-iscreen billi tibda minn nofs. Tajjeb li tibda miċ-ċentru u tmexxi għat-tond ħalli ma tħallix daqqiet. Bl-imxarrab evita li tmiss il-kantunieri.
- Kif tiġi biex tixxotta irrepeti l-istess moviment bħal qabel.
- Ħalli l-iscreen jinxef waħdu.
Wara li tnaddaf l-iscreen, ipprova żommu nadif kemm tista’. Evita li tmiss direttament l-iscreen bis-swaba’ minħabba ż-żjut naturali tagħhom. Biex tnaqqas trabijiet jew ħmieġ milli jkollok fuq il-keyboard, tista’ tpoġġi xi ċarruta rqiqa tal-microfibre fuqha stess qabel ma tkun ser tagħlaq il-laptop.
