Kemm-il programm Taljan tiftakru minn dawn?

Għal min għandu 30 sena u aktar, żgur li jaqbel li qabel l-internet, it-televixin kien l-aqwa sors ta’ mogħdija taż-żmien. L-iktar stazzjonijiet popolari barra dawk Maltin kienu jkunu dawk Taljani. Kienu huma l-uniċi aċċessibli u min jaf kemm ħafna minna, kienu jistennew bi ħġarhom l-appuntament ta’ kull programm. Illum ser inqanqlulkom naqra sens ta’ nostalġija. Kemm tiftakru minn dawn?

1. Non è la Rai – Programm ta’ varjetà li kien jinkludi shows ta’ kant u żfin immexxi minn żgħażagħ. Il-programm ixxandar l-ewwel darba fl-1991 u baqa’ għaddej xi erba’ snin. Konduttriċi li baqgħet tissemma minn dan il-programm hija Ambra Angiolini.
2. La ruota della Fortuna – Programm ta’ divertiment ispirat minn Wheel of Fortune, programm Amerikan. Is-suċċess kbir tiegħu ntlaħaq bit-tmexxija tal-mibki Mike Buogiorno. Buongiorno dam jippreżentah għal madwar erbatax-il sena mill-1989. Din is-sena, il-kunċett tal-programm qed jerġa’ jiġi ppreżentat, din id-darba bis-sehem ta’ Gerry Scotti.
3. Grande fratello – Żgur li ħafna minnkom tiftakru xi ħaġa mill-ewwel edizzjoni. Qatt qabel ma kien ġie trażmess reality show ta’ dan it-tip. Il-GF kien beda jixxandar fis-sena 2000, u minn dakinhar ’l hawn baqa’ dejjem jixxandar b’formati differenti. Ħafna mill-inkwilini li kienu joħorġu mill-GF kienu jiksbu  aktar popolarità matul iż-żmien. Luca Argentero huwa wieħed minnhom.
4. Ciao Darwin! – Programm li kien jixxandar nhar ta’ Sibt u li kien fih siegħa buzz. Paolo Bonolis u Luca Laurenti kienu jagħtu lill-programm doża ta’ komiċità u l-isfidi li kienu joffru ma kinux ikunu faċli. Imbagħad kien hemm min kien jarah għal Madre Natura ;P
5. C’è posta per te – Dan il-programm ilu għaddej madwar 24 sena. Dan l-aħħar, għalkemm jixxandar, ma jdumx sejjer għal ġimgħat twal. Immexxi minn Maria De Filippi, ħafna jħobbu jsegwu l-istejjer ikkumplikati li jgħaddu minnhom in-nies komuni.

Minn barra dawn il-ħames programmi li semmejna kien hemm ukoll Giochi senza frontieri, Buona Domenica, Affari Tuoi u Le Iene. Dawn illum il-ġurnata m’għadhomx jixxandru. Hemm imbagħad programmi oħra bħal Uomini e Donne u l’Isola dei Famosi li bdew snin ilu u għadhom għaddejin sal-ġurnata tal-lum b’modifiki li jseħħu mal-medda taż-żmien.

U intom x’kontu tħobbu l-aktar?