Abela Jgħid Li T-Tax Returns Tiegħu Diġà Huma Aċċessibbli Għal Bernard Grech
Il-Prim Ministru Robert Abela qal li t-tax returns huma diġà aċċessibbli għall-Kap tal-Oppożizzjoni Bernard Grech għax dawn diġà huma fil-pussess tal-Ispeaker tal-Parlament.
Abela qal dan f’kummenti li ta lill-gazzetta maltatoday tard illejla. Dan wara li fl-aħħar sigħat Bernard Grech ħareġ jisfida lill-Prim Ministru biex jippubblika t-tax returns tiegħu tal-Income Tax u tal-VAT.
Fil-kummenti tiegħu, il-Prim Ministru ċaħad li ddiskuta l-evażjoni tat-taxxa ta’ Grech mal-Kummissarju tal-VAT Marvin Gaerty u saħaq li huwa għadda biss informazzjoni li waslitlu mingħand sors fil-Partit Nazzjonalista lill-awtoritajiet tas-saħħa.
“Huwa ċar li Bernard Grech ma jafx il-liġi dwar it-taxxa, hekk kif it-tax returns tiegħu huma diġà fil-Parlament u Grech bħala membru parlamentari diġà għandu l-faċilità li jara t-tax returns tiegħi, l-istess kif għandhom il-mezzi kollha ta’ komunikazzjoni f’pajjiżna,” qal il-Prim Ministru.
Il-Prim Ministru xejjen ukoll l-allegazzjoni li huwa uża l-pożizzjoni tiegħu biex jinfluwenza l-investigazzjoni dwar l-irregolaritajiet fit-taxxa ta’ Grech u insista li meta huwa għadda l-informazzjoni lil Gaerty, l-investigazzjoni kienet diġà konkluża.
“Anke li kieku ridt, ma stajtx ninfluwenza l-investigazzjoni,” qal il-Prim Ministru.
Fis-sajf li għadda, il-midja indipendenti żvelat li l-Kap tal-Oppożizzjoni Bernard Grech kien evada milli jħallas f’eluf kbar ta’ taxxa tad-dħul u tal-VAT f’okkażjonijiet differenti. Fil-fatt huwa ħallas biss dawn it-taxxi wara li ħarġu l-istejjer fil-midja u hekk kif kien se jitfa’ l-kandidatura tiegħu għat-tmexxija tal-Partit Nazzjonalista.
