Duncan Micallef Elett President Ġdid Ta’ Malta Motorsport Federation
Ilbieraħ il-Malta Motorsport Federation organizzat il-laqgħa ġenerali annwali tagħha fejn l-aġenda kienet tinkludi l-elezzjonijiet ta’ tliet karigi fil-kunsill amministrattiv tal-istess federazzjoni: President, Viċi President u Viċi Segretarju.
Iċ-Champion Ewropew tat-’Top Fuel Drag Racing 2017’ Duncan Micallef ġie elett bħala l-President il-ġdid biex b’hekk laħaq flok Tonio Cini li mexxa l-federazzjoni għall-aħħar 12-il sena konsekuttiva. Cini ddeċieda li ma jikkontestax.
Id-delegat sportiv tal-federazzjonijiet u eks Viċi President is-Sur William England, jerġa’ jkun elett bħala Viċi President fejn diġà kien serva f’din il-kariga għal 3 snin.
Is-Segretarju Ġenerali ta’ ‘Old Motors Club Malta’ s-Sur Oliver Attard ma kienx ikkontestat għall-kariga ta’ Viċi Segretarju. Attard serva bħala Segretarju Ġenerali tal-istess Federazzjoni għal 6 snin.
Fl-ewwel diskors tiegħu bħala president, Micallef irringrazzja lil Tonio Cini għas-servizz tiegħu lill-MMF għal dawn l-aħħar 12-il sena, kif ukoll lil dawk kollha li għenuh matul il-presidenza tiegħu.
Micallef qal li wara dawn il-bidliet, il-federazzjoni għandha tibbenefika minn aktar riżorsi biex tindirizza l-ħafna sfidi li jiffaċċjaw il-klabbs, is-sewwieqa u d-dilettanti kollha.
Waħda mill-ewwel miri għall-presidenza tiegħu hija li tara aktar dilettanti jersqu ‘l quddiem u jgħinu lill-federazzjoni biex tgħin lill-klabbs ikabbru l-isport tagħhom.
Amministrazzjoni MMF:
President | Duncan Micallef, Viċi President | William England, Segretarju Ġenerali | Susanne Fenech, Viċi Segretarju | Oliver Attard, Teżorier | Ruben Galea.
It-tim ta’ StradaRjali.com jawgura ħidma fejjieda lil dan il-kumitat il-ġdid ta’ Malta Motorsport Federation.
Ritratti: https://motorstv.mt
