Bil-Filmat: Il-President Tal-Istati Uniti Jaqa’ Tliet Darbiet

Il-partitarji tal-President tal-Istati Uniti kienu qed jilgħabu man-nar meta saħqu li għadu m’għamilx pass ħażin kemm ilu fil-kariga tiegħu.

Dan hekk kif Joe Biden waqa’ tliet darbiet hu u tiela’ t-taraġ sabiex jirkeb l-ajruplan Air Force One.

Minkejja dan, huwa xorta ta salut hekk kif wasal ħdejn il-bieb tal-ajruplan, qabel ma bdiet it-titjira lejn Atlanta.

Is-segretarju tal-midja Karine Jean-Pierre qalet lill-ġurnalisti li l-President jinsab tajjeb.

Spjegat li kien hemm ħafna riħ, u li anke hi kienet se taqa’ hi u tiela’ l-istess taraġ tal-ajurplan.

Dan l-inċident seħħ hekk kif jeżisti tħassib fuq is-saħħa ta’ Joe Biden u jekk jinsabx f’kundizzjoni adekwata biex jaqdi d-dmirijiet tiegħu.

Apparti l-fatt li ftit tas-sigħat qabel, huwa rrefera għall-viċi President Kamala Harris bħala l-President Harris.