Ara: Il-PM Jenfasizza Dwar It-Teħid Tal-Vaċċin – Mira Li L-Vawċers Jitqassmu Fis-7 Ta’ Ġunju
Dr. Lydia Abela tinsab tajba u l-Prim Ministru flimkien mat-tifla Giorgia Mae jinsabu fi kwarantina. Hekk beda l-Prim Ministru f’intervista virtwali li saret mal-Kap tal-Aħbarijiet ta’ ONE News Edward Montebello. Awgura wkoll il-Jum l-Omm it-tajjeb lill-ommijiet kollha.
Il-Prim Ministru appella biex inkomplu nieħdu l-vaċċin hekk kif għada, 10 ta’ Mejju se jibdew ikunu rilaxxati bosta restrizzjonijiet iżda dan ma jfissirx li għadda kollox.
Semma kemm it-teħid tal-vaċċin huwa iżjed kruċjali u ma jistax ikollna tnaqqis fit-teħid tiegħu għaliex dan ikun żball kbir. “Dan jagħti wkoll sens ta’ sigurtà bħala għodda mal-bqija tal-miżuri li għandna”, spjega l-Prim Ministru Robert Abela.
Semma kif fil-Kunsill Ewropew ġie diskuss li kull mexxej Ewropej irid jara li kull individwu f’pajjiżu, jieħu l-vaċċin.
Tkellem ukoll dwar is-summit f’Porto fejn saret laqgħa virtwali mal-Prim Ministru Indjan u li wriet realtà ta’ kif il-pandemija għadha qed tolqot imkejjen fid-dinja. Semma wkoll il-Green Certificate li se jgħin fil-mobilità taċ-ċittadini kemm għall-ivvjaġġar u anke xogħol f’pajjiżi differenti. “Min ma jiħux il-vaċċin, mhux ser ikollu dan iċ-ċertifikat.”
Dan iċ-ċertifikat se jintuża wkoll għal avvenimenti soċjali fil-pajjiż inkluż f’Malta.
It-tema b’saħħitha l-oħra fil-Porto Summit kienet ix-xogħol. Hawnhekk saret referenza għal 100,000 impjieg f’pajjiżna li ntlaqtu u li kienu mgħejjuna mill-Gvern Malti u ma ntilfux b’investiment ta’ biljun u nofs ewro anke permezz tal-Covid-wage supplement.
Elenka għal darb’oħra ir-rilaxx gradwali kif se jsir biex imbagħad, jitkomplew jingħataw l-inċentivi fejn fihom, l-ottimiżu u l-pożittività huma ċentrali. Hawnhekk ħarġet l-osservazzjoni li l-għajnuna mhix se tieqaf; punt ta’ distinzjoni anke meta Malta titqabbel ma’ pajjiżi oħra barranin.
Il-PM Robert Abela ħabbar li fis-7 ta’ Ġunju, hemm il-mira li jitqassmu l-vawċers b’total ta’ €45 miljun.
