Fond Ta’ €50,000 Intiż Biex Jippromwovi U Jirrikonoxxi L-Valur Tal-Proprjetà Intelletwali
Dalgħodu l-Ministeru għall-Ekonomija u l-Industrija nieda l-‘Premju għall-Inkoraġġiment ta’ Ideat Ġodda u r-Rikonoxximent ta’ Proprjetà Intelletwali’, b’fond ta’ €50,000 fi premjijiet.
Is-Segretarju Permanenti fi ħdan il-Ministeru għall-Ekonomija u l-Industrija Nancy Caruana qalet li s-suċċess ta’ edizzjoni passati li tefgħu dawl fuq proġetti li jvarjaw minn inizjattivi teknoloġiċi bħal dawk relatati mal-produzzjoni tal-ikel, inizjattivi xjentifiċi bħal iżjed żvilupp fuq 3D printer li juża teknoloġija innovattiva ta’ laser sa sistemi ta’ moniteraġġ għad-dijabete fost oħrajn. “Proġetti ta’ dan il-livell għoli jawguraw tajjeb għall-kunċett tal-proprjetà intelletwali f’pajjiżna li qed ikompli joħloq kuxjenza fost kulħadd sabiex wieħed jipproteġi l-prodotti tagħhom, disinni, ideat u proġetti”, qalet is-segretarju permanenti.
Matthew Pisani, Id-Direttur għar-Reġistrazzjoni ta’ Proprjetà Industrijali fi ħdan id-Dipartiment tal-Kummerċ, elenka dwar il-ħidma li ssir mid-Dipartiment fuq livell Ewropew partikolarment mal-Uffiċċju tal-EUIPO kif ukoll mid-Dipartiment tant li l-Uffiċċju Malti tal-Proprjetà Intellettwali kien l-ewwel wieħed minn fost l-Istati Membri tal-Unjoni Ewropea li mill-1 ta’ Lulju beda jibgħat l-informazzjoni kollha relatata ma’ trademarks u disinni lill-EUIPO fuq il-pjattaforma tal-blockchain.
Il-‘Premju Proprjetà Intelletwali Malta’, immexxi mid-Dipartiment tal-Kummerċ, huwa mmirat biex jirrikonoxxi u jippromwovi l-ħolqien tal-proprjetà intellettwali f’Malta. Il-premju huwa mqassam f’erba’ kategoriji.
- Premju għal Inizjattiva Kreattiva
- Premju għal Inizjattiva Xjentifika
- Premju għal Inizjattiva Teknoloġika
- Premju għal Inizjattiva ta’ Innovazzjoni Emerġenti
Linji gwida relatati ma dawn il-premjijiet jinsabu fuq www.commerce.gov.mt
Ritratti: DOI
