Investiment Ta’ €21,000 Lil Frame Football Malta Sabiex Tfal B’Diżabilità Jkunu Jistgħu Jilgħabu L-Football
Il-Ministru għall-Inklużjoni u l-Kwalità tal-Ħajja Julia Farrugia Portelli flimkien mas-Segretarju Parlamentari għall-Isport, ir-Rikreazzjoni u l-Għaqdiet Volontarji Clifton Grima u l-Kap Eżekuttiv ta’ SportMalta Mark Cutajar ħabbru li b’għajnuna finanzjarja ta’ €21,000 lil Frame Football Malta setgħu jinxtraw 31 frame speċjalizzat għal tfal b’diżabilità biex ikunu jistgħu jilgħabu l-football.
Frame Football huwa kunċett adattat tal-logħba tal-futbol għal tfal li għandhom bżonn ‘walking frame’ jew krozzi biex jilgħabu l-futbol. Dan l-investiment qiegħed jiżgura u jaċċerta li kull tifel u tifla li għandhom bżonn xi tip ta’ għajnuna mobbli u jixtiequ jilgħabu l-futbol bħall-kumplament tat-tfal jistgħu jagħmlu dan.
Il-Ministru għall-Inklużjoni u l-Kwalità tal-Ħajja Julia Farrugia Portelli qalet li l-prinċipju tal-inklużjoni jikkontribwixxi ħafna għal kwalità ta’ ħajja aħjar. Dan l-investiment juri b’mod tanġibbli kif il-prinċipju tal-inklużjoni ma jkunx biss wieħed għal fuq il-karta imma jkun attwat fil-konkret. L-inklużjoni fl-isport hi waħda mis-sisien tal-istrateġija nazzjonali għal persuni b’diżabilità li se titnieda fil-ġimgħat li ġejjin.
F’intervent li għamel waqt il-preżentazzjoni ta’ apparat speċjalizzat, is-Segretarju Parlamentari Clifton Grima qal li llum hija ġurnata storika għall-inklużjoni fl-isport Malti u għat-tfal li għandhom diżabilità. “L-isport jgħaqqadna, iżda biex verament inkunu nistgħu ngħidu li permezz tal-isport kulħadd huwa inkluż irridu nibqgħu ninvestu biex kull persuna, irrispettivament jekk għandhiex diżabilità jew le, tkun parteċipi fl-isport.” Is-Segretarju Parlamentari qal li l-missjoni tal-gvern hija li minbarra li jinkisbu riżultati prestiġjużi mill-atleti Maltin, kull individwu jkollu aċċess biex jitħarreġ u jipprattika l-isport.
Il-Kap Eżekuttiv ta’ SportMalta Mark Cutajar saħaq li dan l-investiment hu parti fundamentali mill-missjoni ta’ SportMalta, dik li tgħin sabiex ikun hawn soċjetà aktar b’saħħitha, inklussiva u ta’ suċċess.
Il-President tal-Frame Football Malta Rita Darmanin Carbonaro saħqet li l-investiment ipprovda għodda meħtieġa għal dawn it-tfal u ż-żgħażagħ sabiex ikomplu jiżviluppaw il-ħilijiet tagħhom fil-logħba tal-futbol li tant iħobbu, kif ukoll tpoġġihom fuq l-istess livell ta’ klabbs oħra barra minn xtutna li magħhom ikunu jistgħu jipparteċipaw u jikkompetu f’tournaments u attivitajiet sportivi oħrajn.
