Imħabbar Pjan Ta’ Ristrutturar Sabiex L-Air Malta Tkun Salvata – Il-Ħaddiema Jridu Jinżlu Bin-Nofs

 Imħabbar Pjan Ta’ Ristrutturar Sabiex L-Air Malta Tkun Salvata – Il-Ħaddiema Jridu Jinżlu Bin-Nofs

Il-Ministru għall-Finanzi Clyde Caruana f’konferenza tal-aħbarijiet ħabbar illi biex il-linja nazzjonali tal-ajru l-Air Malta ssalva hemm bżonn li n-numru ta’ ħaddiema jinżel bin-nofs.

Intqal li dalgħodu saret  laqgħa mal-unions kollha dwar id-diskussjonijiet li l-Gvern kellu mal-Kummissjoni Ewropea u dwar x’inhi triq ‘il quddiem.

Il-Ministru Caruana qal li bħalissa hemm 890 ruħ u dawn iridu jinżlu għal 430.

Mil-lejla stess il-Gvern se jniedi skema ta’ Voluntary Employee Transfer sabiex dawk interessati jidħlu f’impjieg alternattiv mal-Gvern.

Sa l-ewwel kwart tas-sena din l-iskema ħa tkun miftuħa għall-ħaddiema li jaħdmu fl-amministrazzjoni jew Cabin Crew, li minn dawn se jkun jeħtieġ li jitilqu madwar 100 ħaddiem.

Sat-tieni kwart tas-sena se jkunu qed jitwaqqfu mat-300 ħaddiem li jaħdmu bħala groundhandlers. Dan is-servizz minflok se jibda jsir minn kumpanija privata.

Il-Ministru Caruana qal li s-servizz tal-ground handling f’Malta jiswa’ €12-il miljun fis-sena, li jfisser li jiswa’ aktar mill-ajruport ta’ Charles de Gaulle fi Franza.

Iċ-Chairman Eżekuttiv tal-Air Malta David Curmi qal li l-problemi tal-Air Malta ma bdewx bil-pandemija.

Qal li l-kumpanija ilha tirreġistra telf mill-2005 u sal-2020 għamlet telf ta’ €258 miljun.

Huwa kien ċar ukoll meta semma’ li rotot li mhumiex profittabbli, se jitwaqqfu.

Matthew Pullicino

Insegwi b'mod attiv dak kollu li jkun qed jiġri, kemm lokali kif ukoll internazzjonali. Naffaxina ruħi bl-istorja, arti u kultura li għandna f'pajjiżna u dak kollu li huwa Malti. Naħdem ħafna qrib għaqdiet volontarji fil-qasam kulturali u l-esperjenza tiegħi f'dan ix-xogħol nieħu pjaċir naqsamha ma' ħaddieħor.