Imħabbra Dettalji Loġistiċi Għall-Valletta Pageant Of The Seas
Illum tħabbru d-dettalji loġistiċi marbuta mal-Valletta Pageant of the Seas li ser jittella’ nhar is-Sibt 25 ta’ Ġunju fil-Port il-Kbir.
Waqt konferenza tal-aħbarijiet, iċ-Chairman tal-Aġenzija Kulturali għall-Belt Valletta, Jason Micallef tenna li dan l-ispettaklu varjat iddedikat lit-80 anniversarju mill-wasla tal-konvoj, magħruf bħala ta’ Santa Marija fl-1942, jibda fit-8pm u jista’ jitgawda minn Ta’ Liesse, iż-żona fejn jidħol il-fast ferry u Xatt il-Barrieri kollu. Iż-żona ta’ Xatt il-Barrieri se tkun magħluqa għat-traffiku.
Il-port se jagħlaq fis-6pm sa tmiem l-ispettaklu allura min se jagħmel użu mil-laneċ tal-passiġġieri mill-Kottonera, għandu jaħseb kmieni biex ma jkunx iddiżappuntat. Se jkun hemm servizz tal-linja wara li jispiċċa l-avveniment lejn diversi lokalitajiet fil-11:30pm u fil-11:50pm.
Is-serata tiftaħ b’Tellieqa Telliqun – kompetizzjoni divertenti fil-Port il-Kbir bejn sitt timijiet li se jtellqu l-inġenji tal-baħar li bnew huma stess, mingħajr l-użu ta’ imqadef, magni jew għajnuna oħra. Dawn il-bċejjeċ huma msemmija għall-vapuri tal-forzi navali Ingliżi li kienu preżenti fi żmien it-Tieni Gwerra Dinjija.
Il-band Capone Bungt Bangt mill-Italja, ser tagħti prestazzjoni b’numru ta’ strumenti magħmula minn materjal riċiklat. Fost dawn insibu numru ta’ strumenti tal-perkussjoni, drum kit, u dawk magħrufa bħala basso da ponte, scopa elettrica u l-mazzimba.
The Palace String Orchestra, taħt id-direzzjoni ta’ Ryan Abela, ser tagħti kunċert ta’ mużika popolari b’arranġamenti mużikali ta’ Maestro Paul Abela. Il-mużika ser tiħodna lura fiż-żmien permezz ta’ siltiet minn kull deċenju mil-lum sal-erbgħinijiet. Is-snin 70 se jġibu magħhom ukoll regatta speċjali bil-lejl li kienet saret fl-1979 bil-parteċipazzjoni ta’ sitt klabbs minn madwar il-Port fuq dgħajjes tal-pass.
“It-Taqtigħa”, kitba ta’ Jean Pierre Magro b’direzzjoni ta’ Lee-N Abela, bis-sehem tal-Moveo Dance Company u numru ta’ atturi prominenti lokali, tfakkar il-Konvoj ta’ Santa Marija.
Ser ikun hemm ukoll projezzjonijiet fuq il-Forti Sant’Anġlu u fuq 6 sferi ta’ 6 metri ‘l waħda magħmulha minn 2,500 fjakkola. Spettaklu tal-logħob tan-nar tal-ajru ser jagħlaq is-serata.
Dan huwa avveniment bla ħlas.
