Trasport speċjali għall-Festa Frawli fl-Imġarr
Għada l-Ħadd se titella’ l-14-il edizzjoni ta’ Festa Frawli fl-Imġarr.
Waqt din il-festa ser ikun hemm diversi bankarelli jbiegħu kemm frawli u kif ukoll diversi prodotti tal-ikel magħmulin mill-frotta. Ser ikun hemm ukoll artisti lokali u koki professjonali jsajru riċetti bil-frawli.
L-attività se tibda mill-10 ta’ filgħodu u tibqa’ sejra sal-ħamsa ta’ wara nofsinhar. Għal aktar informazzjoni fuq l-attività, wieħed jista’ jżur is-sit uffiċjali ta’ Festa Frawli https://festafrawli.com/.
Intant, il-Malta Public Transport se tkun qed topera servizzi żejda mill-Belt għall-Imġarr permezz tar-Rotta X44 tagħha.
Is-servizz speċjali, li se jitlaq mill-Belt għall-Imġarr kull 15-il minuta, se jibda mill-10.00 bl-aħħar vjaġġ jitlaq lejn l-Imġarr fit-15:00. Il-vjaġġ tar-ritorn se jibda jopera mill-Imġarr għall-Belt Valletta kull 30 minuta, u jibda mill-11.00 sas-18.00.
Barra minn hekk, se jkun hemm servizz ta’ shuttle minn Ta’ Qali għall-Imġarr u lura, bi shuttle titlaq kull 30 minuta. Ix-shuttle minn Ta’ Qali għall-Imġarr se topera bejn l-10.00hrs u t-15:00, filwaqt li s-shuttle mill-Imġarr għal Ta’ Qali se topera bejn il-11.00 u s-18.00hrs.
Ta’ Qali u Triq Infetti se jintużaw bħala żoni għal Park & Ride sabiex jiffaċilitaw il-parkeġġ għal dawk li jattendu u jipprovdulhom trasport għall-avveniment.
