Bjorn għadu ma jafx jekk martu Maria qaltlux ‘iva’ meta ppropona!
Koppja Maltija li dejjem tmiss il-qlub hija propju dik magħmula minn Bjorn Formosa u martu Maria. Flimkien affrontaw mumenti diffiċli matul dawn id-disgħa snin minn meta Bjorn kien dijanjonizzat bl-ALS, iżda d-determinazzjoni tagħhom u l-imħabba li għandhom lejn xulxin iżżommhom uniti fil-missjoni tagħhom li jgħinu lil persuni oħrajn li għaddejjin mill-istess diffikultajiet.
Bjorn u Maria ltaqgħu meta hi kienet marret tgħin lil Bjorn jagħmel l-Ice Bucket Challenge, ftit wara li kien beda jitkellem dwar l-esperjenza tiegħu bid-dijanjożi tal-ALS. Minn hemm, b’xi mod jew ieħor dejjem baqgħu jiltaqgħu għal xi ħaġa jew oħra, sakemm bdew joħorġu flimkien!
Qalulna dwar meta Bjorn ippropona lil Maria. Kienu Hyde Park, f’Londra, fiż-żmien meta Bjorn kien qed imur hemm għall-kura. Kienu ilhom ftit iduru f’dan il-ġnien, u fil-pront Bjorn ipproponielha. Dan il-mument kien verament emozzjonanti għal Maria tant li kienet bkiet ħafna! B’ċajta, Bjorn kompla billi qalilna li tant kemm bkiet, għadu s’issa ma jafx jekk qaltlux iva jew le, imma xorta żżewġu.
“Maria indispensabbli għalija”
Bjorn faħħar ħafna lil Maria u qal li hi bniedma indispensabbli għalih. Sostna li għalih hija mara perfetta, tadatta għal kollox u dejjem lesta ssolvi kull problema li tiġi għalihom. Intant, Maria spjegat li Bjorn huwa bniedem intelliġenti u determinat, żewġ kwalitajiet li verament jaffaxxinawha u tammirra fir-raġel tagħha.
Spjegaw li ħadd minnhom qatt ma setgħa jimmaġina kif kienet se tiżviluppa ħajjithom. “Qabel ma tgħixha ma tkunx taf. Inutli kemm tippjana, għax il-ħajja u dak li jiġri fir-realtà huma differenti.
“Aħna se nkunu hawn biex ngħinukom”
Bjorn u Maria sostnew li huma se jkunu hemm għal dawk kollha li għandhom l-ALS. Intant, appellaw lill-koppji bħalhom sabiex jaħdmu biex jadattaw għas-sitwazzjoni kif l-aħjar li jistgħu. “Tridu taċċettaw l-għajnuna għax hija marda verament ikkumplikata,” spjega Bjorn.
Flimkien, Bjorn u Maria jgħinu ħafna persuni li jgħixu f’Dar Bjorn jew li matul iż-żmien jiġu bżonn is-servizzi tagħhom.
Grazzi lil The Atrium tal-vawċer li pprovda lil Bjorn u Maria bħala rigal fi żmien San Valentinu.
