Raġel Residenti L-Gżira Arrestat B’Rabta Ma’ Traffikar Tad-Droga

Sqalli ta’ 48 sena, residenti l-Gżira, ilbieraħ war nofs inhar ġie arrestat mill-Pulizija tad-Distrett ta’ Tas-Sliema b’rabta ma’ traffikar tad-droga kokaina.

Wara jiem ta’ osservazzjoni fuq residenza fi Triq Sir Charles Cameron, il-Gżira, b’suspett li fiha qiegħed isir traffikar ta’ droga u allegatament huwa nvolut ir-raġel barrani, il-Pulizija tad-Distrett esegwew mandat ta’ arrest fil-konfront tiegħu

Wara li ġie arrestat, saret tfittxija fir-residenza, kif ukoll fil-vettura tiegħu, fejn instabu madwar 20 qartas b’sustanza suspettata droga kokaina u madwar €3,000 fi flus kontanti.

Ir-raġel qiegħed jinżamm fil-lock-up tal-Pulizija fil-Kwartieri Ġenerali, il-Floriana u mistenni jitressaq il-Qorti għada.

L-investigazzjonijiet tal-Pulizija tad-Distrett għadhom għaddejjin.