Tinġabar Somma Rekord Ta’ €3,133,430 Waqt Il-Maratona Ta’ Puttinu
Matul maratona li saret ilbieraħ fuq l-istazzjonijiet kollha tat-televiżjoni lokali nġabret is-somma rekord ta’ aktar minn €3,133,430 b’risq Puttinu Cares.
Din is-somma se tkun qed tintuża biex tinxtara binja fiċ-ċentru ta’ Londra fejn tkun tista’ tilqa’ fiha familji li jkollhom xi ħadd għażiż bżonn kura fi sptar fl-Ingilterra.
Din il-binja l-ġdida se tkun qed tilqa’ fiha madwar 20 familja u se tkun qed tissemma’ għat-Tabib Victor Calvagna.
Waqt il-maratona, f’intervent li għamel il-Prim Ministru Robert Abela ħabbar li f’isem il-Gvern se jkun qed jgħaddi €50,000 mill-Fond għall-Kawżi Ġusti biex jkun jista’ jitwettaq dan il-proġett kbir.
