Sewwieq Ta’ Mutur Bi Ġrieħi Gravi Wara Inċident F’Għawdex

Raġel minn Nepal ta’ 28 sena weġġa’ gravi wara inċident tat-traffiku fi Triq San Ġwann Battista, ix-Xewkija, Għawdex. Dan l-inċident seħħ ilbieraħ, għal xi s-7:30pm.

Fi stqarrija l-Pulizija qalet li minn investigazzjoni preliminari jirriżulta li seħħet ħabta bejn mutur tal-għamla SYM Symphony misjuq minn raġel minn Nepal ta’ 28 sena, residenti r-Rabat, Għawdex u Kia Rio misjuqa minn mara ta’ 31 sena residenti x-Xewkija.

Tim mediku ta l-assistenza u ambulanza ħadet lix-xufier tal-mutur l-Isptar Ġenerali t’Għawdex għal aktar attenzjoni medika. Aktar tard, hu ġie ċċertifikat bi ġrieħi gravi.

Il-Pulizija għaddejja bl-investigazzjonijiet fuq il-każ.