Clyde Puli Jtemm Il-Karriera Politika Tiegħu

 Clyde Puli Jtemm Il-Karriera Politika Tiegħu

“Hekk kif ġie xolt il-Parlament u ntemmet il-leġislatura, xtaqt ninfurmak bid-deċiżjoni tiegħi li ma nikkontestax l-elezzjoni ġenerali li jmiss. Din id-deċiżjoni ħadtha wara riflessjoni u diskussjoni mal-familja tiegħi u ma’ dawk qrib tiegħi.”

Hekk kiteb Clyde Puli f’ittra li għadu kemm ippreżenta waqt laqgħa kordjali mal-Kap tal-Partit Nazzjonalista Bernard Grech.

Puli qal li matul il-karriera politika tiegħu serva b’impenn sa mill-ewwel ġurnata, “imma issa li sehmi tajtu għal tul ta’ żmien, inħoss li wasal iż-żmien li nterraq toroq ġodda.”

Clyde Puli tenna li jinsab grat ħafna li ngħata l-privileġġ li jservi f’4 leġislaturi parlamentari, 3 termini ta’ kunsill lokali u 30 sena fl-istrutturi tal-Partit.

Huwa rringrazzja lill-Kumitat Eżekuttiv li xhur ilu kien talbu u approva l-kandidatura tiegħu biex jikkontesta l-elezzjoni ġenerali. Irringrazzja wkoll lil kull mexxej li ħadem miegħu tul is-snin kollha.

Puli kiteb li huwa ħadem bla heda b’onestà u b’sens ta’ lealtà lejn il-prinċipji tal-partit kemm fil-mumenti ta’ glorja iżda ankè fil-mumenti ta’ sfida. “Il-politika dejjem fissret għalija vokazzjoni ta’ servizz. Aktar milli eżerċizzju ta’ poter, il-politika għalija kienet missjoni biex ngħin u ntejjeb il-ħajja tan-nies.”

Huwa awgura lil Partit kull suċċess f’din l-elezzjoni, filwaqt li appella lill-Kap tal-PN biex jibqa’ kburi jsostni l-prinċipji awtentiċi li sawru l-Partit matul is-snin.

Finalment huwa rringrazzja lill-poplu Malti u lill-kostitwenti tiegħu. “M’għandix kliem biex nirringrazzjahom tal-fiduċja li wrewni matul is-snin u tal-privileġġ li tawni biex inservihom. Jekk inqast lil xi ħadd, imqar jekk bla intenzjoni nitlob maħfra.”

Matthew Pullicino

Insegwi b'mod attiv dak kollu li jkun qed jiġri, kemm lokali kif ukoll internazzjonali. Naffaxina ruħi bl-istorja, arti u kultura li għandna f'pajjiżna u dak kollu li huwa Malti. Naħdem ħafna qrib għaqdiet volontarji fil-qasam kulturali u l-esperjenza tiegħi f'dan ix-xogħol nieħu pjaċir naqsamha ma' ħaddieħor.

1 Comment

Comments are closed.