Anzjan Imut Wara Li Waqa’ Kważi Sular F’Għalqa F’Kerċem
Anzjan ta’ 74 sena tilef ħajtu traġikament wara li waqa’ kważi sular f’għalqa, f’Kerċem.
L-aċċident seħħ dalgħodu, għall-ħabta tat-8:30am, f’għalqa fi Triq Għar Ilma, Kerċem, Għawdex.
Il-Pulizija marret minnufih fuq il-post u minn stħarriġ preliminari li sar, irriżulta li l-vittma mir-Rabat, Għawdex jidher li waqa’ għoli ta’ kważi sular għal ġo għalqa minn trejqa biswit l-istess għalqa.
Fuq il-post issejjaħ tim mediku sabiex jassisti, imma sfortunatament huwa ġie ċċertifikat mejjet fuq il-post.
Bil-każ ġiet infurmata l-Maġistrat tal-Għassa Dr Simone Grech li fetħet inkjesta filwaqt li l-investigazzjonijiet tal-Pulizija għadhom għaddejjin.
