Semgħu L-Kelma “Ma” Wara Ħafna Snin Ta’ Stennija
Numru ta’ ommijiet ta’ tfal fuq l-ispettru tal-awtiżmu rrakontaw dakinhar li, wara ħafna stennija, semgħu lil uliedhom jgħidulhom il-kelma “ma”.
Filwaqt li uħud minn dawn it-tfal qalu din il-kelma verbalment wara diversi snin, oħrajn illum qed jikkomunikaw ma’ ommhom permezz ta’ device speċjalizzat li jgħinhom jesperimu ruħhom.
“Ħafna ġenituri m’għandhomx ix-xorti li għandi jien” qalet Sefora omm Diego, tifel fuq l-ispettru tal-awtiżmu li llum qed jitkellem il-bżonnijiet bażiċi tiegħu.
“Omm meta jkollha it-tfal l-aktar kelma li tkun qed tistenna hija l-kelma ‘ma’…iżda hawn ħafna ġenituri li ma semgħux din il-kelma. Meta tistenna u tistenna u dik il kelma ma toħroġx huwa wieħed mill-ikbar uġiegħ li tħoss”.
Ommijiet oħrajn irrakuntaw il-ferħ li ħassew meta permezz tad-device uliedhom ikkomunikaw għall-ewwel darba. Omm Eli tgħid, “Meta ħa id-device kiteb, ‘jien irrid lill-mummy’. Dak il-ħin bkejt għax qatt ma kont ħsibt li se nisma’ dawk it-tlett kelmiet”.
Għada, is-Sibt 7 ta’ Mejju, lejliet Jum l-Omm, inti tista’ tgħin lil tfal bħal Eli sabiex jirċievu dan id-device u jkunu jistgħu jibdew jikkomunikaw. Segwi l-maratona tal-Malta Trust Foundation fuq l-istazzjonijiet kollha tat-televixin bejn is-1.30pm u nofsillejl.
