Pjanti u fjuri perikolużi għat-tfal
Illum saret moda li żżejjen id-dar b’diversi pjanti u fjuri sabiex toħloq dik ir-riħa friska u nadifa. Madankollu, jekk fid-dar tiegħek ikun hemm it-tfal, dawn kapaċi jkunu ta’ periklu għalihom.
- In-Narċis
L-isem xjentifiku ta’ din il-fjura huwa Narcissus. Fil-mitoloġija Griega, Narcissus kien tfajjel magħruf għas-sbuħija tiegħu u jingħad li hu kien jitpaxxa jħares lejn ir-rifless tiegħu fl-ilma. Madankollu, tant kemm kien ikun mitluf iħares lejh innifsu li lanqas biss baqa’ jiekol u jixrob.
Fi Franza, din il-fjura kienet tintuża sabiex biha jagħmlu s-sapun u l-fwejjaħ kif ukoll għal xi prodotti tad-dar. Madankollu, din il-fjura jaf tkun perikoluża, speċjalment jekk it-tfal jibilgħu xi parti minnha.
- Aloe Vera
Illum il-ġurnata l-meraq ta’ din il-pjanta għandu benefiċċji kbar, l-iktar għax-xagħar u għall-ġisem. Fil-fatt, uħud jgħidu li Cleopatra kienet tuża l-meraq ta’ din il-pjanta sabiex ġisimha jibqa’ jidher sabiħ. Għal dan iż-żmien tas-sajf, l-iktar wara xi xemxata, hawn min jemmen li jekk iddellek il-meraq ta’ din il-pjanta ser tnaqqas il-ħruq u tħoss ġismek frisk. Madankollu, għalkemm din il-pjanta għandha ħafna benefiċċji, din jaf tkun ta’ periklu għat-tfal jekk imissu magħha.
- Il-Ġjaċint
Skont il-mitoloġija Griega, Hyacinthus kien prinċep li tant kemm kien sabiħ, li Apollo, l-Alla tax-xemx, kien ħa grazzja miegħu. Madankollu, Hyacinthus miet waqt li kienu qed jilagħbu logħba. Wara dan, Apollo ħoloq din il-fjura magħmula minnu sabiex b’xi mod, jibqa’ jgħix.
Ħafna nies jiddekoraw b’din il-pjanta peress li għandha kuluri sbieħ u kapaċi tfewwaħ immens.
Għalkemm din hija pjanta sabiħa ħafna, tista’ tikkawża ħsara fi tfal żgħar speċjalment, jekk wieħed jibla’ parti mill-fjuri tagħha.
- L-Oleander
Din il-fjura tissimbolizza l-kumplikazzjonijiet fejn jidħlu l-imħabba u r-relazzjonijiet. Il-pjanta u l-fjura huma tossiċi immens, anki għall-adulti aħseb u ara għat-tfal. Kull parti ta’ din il-pjanta hija tossika u għalhekk, ikun aħjar jekk ma tkabbarha imkien.
- L-Iris
Din il-fjura hija sabiħa immens, tant li xi kultant tingħata bħala rigal ukoll. Dan l-isem ifisser qawsalla u din l-Alla Griega tiġi assoċjata l-aktar mal-kunċett ta’ mewt. Fil-fatt, in-nisa li kienu jmutu, kienu jħallulhom din il-fjura ħdejhom sabiex din l-Alla tiggwidahom għall-ħajja ta’ dejjem.
Jingħad li l-kura tagħha hija waħda sempliċi u tpaxxi l-għajnejn. Fil-fatt, din hija popolari ħafna fid-djar. Madankollu, oqgħod attent għaliex din tista’ tkun ta’ periklu għat-tfal.
Dawn huma uħud mill-pjanti u fjuri li kapaċi jkunu tossiċi. B’hekk, qabel ma tkabbar pjanta jew fjura fid-dar tiegħek, ara li din se tkun ta’ ġid għal kull min jidħol f’darek.
